Kona Kai ʻŌpua

Ha‘aheo Hawai‘i i nā Kona
Ka wai kau i ka maka o ka ‘ōpua
Hualālai kau mai i luna
Ka heke ia o nā Kona
‘Āina wela ‘i‘o nō nā Kona
He ‘Eka ka makani a e ‘olu ai
Ka pā kolonahe a ke Kēhau
I ka ‘ili o ka malihini

Hui:
Hanohano ‘o Kona kai ‘ōpua i ka la‘i
‘Ōpua hīnano kau i ka mālie
Pua‘i nā wai i ka maka o ka ‘ōpua
‘A‘ole nō he lua a e like aku ai
Me Kona kai ‘ōpua
Ke kai mā‘oki‘oki
Ke kai malino a‘o Kona

Bridge:
Ha‘aheo i ka mālie
‘O Kona kai ‘ōpua i ka la‘i
Kilakila ‘o Hualālai
I ke kai malino a‘o Kona

Ua ‘ike i ka nani o Kailua
Ke kapikala a‘o nā Kona
Me Kahalu‘u i ka wai māpuana
Hōlualoa i ka ‘ehu a ke kai
Keauhou i ka ‘ili‘ili nehe
Me Helani i ka wai o Pukaiki
Me Kainaliu i ka uhiwai
Me ka hau anu o Mā‘ihi

Aloha ‘ia nō ‘o Ka‘awaloa
Ka pali kapukapu o Keōua
Ka wai hu‘ihu‘i o Hāli‘ilua
Me ka papa kōnane a‘o Hikiau
‘O ka lā hiki i ka la‘i o Alāiki
Me Ho‘okena i ka wai o Pūhau
Ka pewa kapalili o ka manini
Nini ‘oe me ka ‘eha koni

Source: Song Contest 2016 program